आजदेखि विश्वकप फुटबल सुरु हुँदै

मा प्रकाशित


काठमाडौं ।
आज रातिदेखि ‘फिफा विश्वकप फुटबल प्रतियोगिता २०१८’ सुरु हुँदैछ। रसियाको मस्कोस्थित लुज्निकी रंगशालामा २१औं संस्करणको विश्वकप फुटबल प्रतियोगिताको विधिवत उद्घाटन हुनेछ। उद्घाटन खेलमा आज आयोजक रसिया र साउदी अरेबिया आमनेसामने हुँदैछन् ।

फुटबलको महासंग्राम अर्थात् विश्वकप फुटबलको आज मस्कोस्थित लुजनिकी रंगशालामा उद्घाटन हुँदैछ । २१ औ संस्करणको विश्वकपमा युरोपबाट १४,एसिया, अफ्रिका र दक्षिण अमेरिकाबाट ५–५ र उत्तर अमेरिकाबाट ३ टोली सहभागी छन् ।

६ क्षेत्रबाट भएका छनोट प्रतियोगिताबाट छानिएका उत्कृष्ट ३२ टिमबीच विश्वकपमा प्रतिस्पर्धा हुँदैछ। ३२ स्थानका लागि कुल २ सय ९ टिमले सहभागिता जनाएका थिए। जहाँ ८ सय ६८ खेलमा २४ सय ५४ गोल भएर थिए, जसले ३२ टिमको भाग्यको फैसला भएको थियो।

अब यी ३२ टिमबीच २१ संस्करणको उपाधिका लागि एक महिना प्रतिस्पर्धा चल्नेछ। ८ समूहका रहेका ४–४ टिमबीच समूह चरणमा प्रतिस्पर्धा हुनेछ। समूह चरणबाट छानिएका २–२ टिम अन्तिम १६ मा पुग्नेछन्। त्यसपछि क्वार्टरफाइनल, सेमिफाइनल, तेस्रो स्थान र फाइनल गरी कुल ६४ खेल हुनेछ र एक विजेता छानिनेछ।

बिहीबार साँझ हुने उद्घाटन समरोहमा ब्रिटेनका गायक रोबी विलियम्सले आफ्नो प्रस्तुती दिनेछन्। उनलाई रसियाकी गायिका सोप्रानो अइडा गारिफुलिना र ब्राजिलका पूर्व फुटबलर रोनाल्डोले साथ दिनेछन्। उद्घाटन समारोह आधा घन्टा चल्नेछ। राति सवा ८ बजे सुरु हुने समारोह आधा घण्टा चल्नेछ। लगत्तै रसिया र साउदी अरेबियाबीचको खेल सुरु हुनेछ। उद्घाटन समारोहमा रंगशालामा ८० हजार दर्शक उपस्थित हुनेछन्।

रसिया विश्वकपका लागि ३२ टिमका कुल ७ सय ३६ खेलाडी सहभागी हुँदैछन्। यी मध्ये २ सय खेलाडी दोस्रो पटक खेल्दैछन्। जसमा सन् २०१४ को विश्वकप खेलेका १ सय ८६ र सन् २०१० को विश्वकप खेलेका ६१ खेलाडी छन्। २१ खेलाडी सन् २००६ को विश्वकप खेलेका छन्। एक खेलाडी भने २००२ मा जापान र कोरियामा भएको विश्वकप खेलेका खेलाडी पनि छन्। उनी हुन् मेक्सिकोको डिफेन्डर राफा मार्क्युज। उनी मैदान उत्रिएमा पाँच वटा विश्वकप खेल्ने चौथो खेलाडी हुनेछन्।

प्रतिक्रिया दिनुहोस्... (कृपया शिष्ट भाषा प्रयोग गर्नुहोला)

error: Content is protected !!