नेपालद्वारा सिंगापुर २२ रनले पराजित

मा प्रकाशित


काठमाडौँ, ६ साउन । सिंगापुरमा जारी उन्नाइस वर्षमुनिको विश्वकप क्रिकेट छनोट प्रतियोगिताअन्तर्गत आज भएको चौथो खेलमा नेपालले सिंगापुरलाई २२ रनले पराजित गरेको छ।

सिंगापुरको इन्डियन एशोसिएसनको क्रिकेट मैदानमा भएको खेलमा टस जितेर ब्याटिङ गरेको नेपालले ४६ दशमलव ५ ओभरमा सबै विकेट गुमाउँदै १६८ रन बनायो । जवाफी ब्याटिङमा उत्रेको सिंगापुर ४६ दशमलव ५ ओभरमा सबै विकेट गुमाउँदै १४६ रनमा समेटियो ।

सिंगापुरका लागि रोहन रांगार्जनले २३, सिन अग्रवालले २१, सिद्धान्त सिंहले २५, युवराज सिंहले १९ र हन्सुल दीपले ३२ रन बनाए ।

सिंगापुरलाई १४६ रनमा रोक्ने क्रममा नेपालका कप्तान सन्दीप लामिछाने एक्लैले चार विकेट लिए । त्यसैगरी किशोर महतो र पवन शर्राफले समान दुई दुई विकेट लिए भने दीपेन्द्रसिंह ऐरीले एक विकेट लिए ।

त्यसअघि टस जितेर पहिले ब्याटिङ गरेको नेपालका लागि दीपेन्द्रसिंह ऐरीले अर्धशतक पूरा गरे । ८३ बल खेलेका उनले दुई छक्का र दुई चौका प्रहार गर्दै ५४ रन जोडे । प्रारम्भिक ब्याट्सम्यान सन्दिप सुनारले एक छक्का र दुई चौका हान्दै २६ तथा प्रकास केसीले २३ रन बनाए ।

बलिङतर्फ सिंगापुरका लागि वीर विक्रम विश्वासरेले तीन तथा आर्यमान सुनिल र अहान गोपीनाथले समान दुई÷दुई विकेट लिए । विश्वासरेले १० ओभरमा दुई मेडन राखि २९ रन दिए । आर्यमानले पाँच ओभरमा २३ रन तथा गोपीनाथले १० ओभरमा ३१ रन खर्चे । अंश भार्गभ र रोहनले एक÷एक विकेट लिए ।

डबल राउण्ड रोविन लिगमा भएको उक्त प्रतियोगितामा नेपालले यसअघि पहिलो खेलमा सिंगापुरलाई चार विकेटले तथा मलेसियालाई पाँच विकेटले हराएको थियो । बिहीबार तेस्रो खेलमा अफगानिस्तानसँग नेपाल १४१ रनले पराजित भएको थियो ।

प्रतियोगिताको शीर्ष स्थानमा रहने टोलीले अर्को वर्ष न्युजिल्याण्डमा हुने उन्नाइस वर्षमुनिको विश्वकप क्रिकेट प्रतियोगितामा खेल्न पाउनेछ । चार खेल खेलिसक्दा नेपाल तीन जित र एक हारसँगै ६ अङ्कका साथ दास्रो स्थानमा छ । अफगानिस्तान अहिलेसम्म खेलेको चारवटैमा विजयी भई ८ अङ्कसहित शिर्ष स्थानमा रहेको छ ।रासस

प्रतिक्रिया दिनुहोस्... (कृपया शिष्ट भाषा प्रयोग गर्नुहोला)

error: Content is protected !!